விரால் மீன் வளர்ப்பு...!

விரால் மீன் வளர்ப்பு...!

 சுயதொழில் செய்ய விரும்புபவர்கள் தங்களுடைய தோட்டத்தில் விரால் மீன் உள்ளிட்ட சில வகை மீன்களை வளர்த்து அதன் மூலம் லாபம் பெற முடியும். அதைப் பற்றி இன்று காண்போம்.

இனங்கள் :

🐟 விரால் மீன்களின் தலை, பாம்பின் தலையைப்போல் தோற்றமுடையது. அவை பாம்புத் தலை மீன் என அழைக்கப்படுகிறது. இவை, இந்தியா, பாகிஸ்தான், இலங்கை, வங்காளதேசம், நேபாளம், பர்மா, தாய்லாந்து, சீனா, வியட்நாம், கம்போடியா போன்ற நாடுகளில் பரவி உள்ளன.

🐟 விரால் மீன் இனங்களில் நமது நாட்டில் மட்டும் உள்ளினங்கள் காணப்படுகின்றன. அவற்றுள் வளர்ப்புக்கு இரண்டு உள்ளினங்கள் மிகவும் முக்கியமானவை. அவை, சன்னா மரூலியஸ் (ராட்சத விரால்), சன்னா ஸ்ட்ரையேட்டஸ்.

குட்டை அளவு :

🐟 10 சென்ட் நிலத்தில் 1.5 மீட்டர் ஆழத்திற்கு குழி எடுக்க வேண்டும். அந்த குழியில் இருந்து எடுக்கும் மண்ணைக் கொண்டே கரை அமைத்துக் கொள்ள வேண்டும்.

🐟 மழைக்காலத்தில் மழைநீர் இந்த குட்டையில் வந்து தேங்கும்படி கால்வாய் அமைத்துக் கொள்ள வேண்டும். வீட்டில் பயன்படுத்தப்படும் கழிவுநீரும் இந்த குட்டைக்கு வந்து சேரும்படி அமைத்துக் கொள்ள வேண்டும்.

🐟 மழைக்காலங்களில் குட்டைக்கு நீர் அதிகம் வரும் போது எதிர் தண்ணீரில் மீன்கள் தப்பி செல்லாமல் இருக்க குட்டையை சுற்றி வளை அமைக்க வேண்டும்.

🐟 குட்டையில் எப்போதும் 4 அடி அளவிற்கு நீர் நிரம்பியிருக்கும் வகையில் போதிய அளவு தண்ணீர் வசதி இருக்க வேண்டும். வாழை போன்ற பொருளாதாரப் பயன்தரும் மரங்களை குளக்கரையின் ஓரங்களில் வளர்ப்பது நல்லது.

சந்தை :

🐟 மக்களிடையே உள்ள+ர் மீன்களுக்கு நல்ல வரவேற்பு உள்ளது. அதிலும் விரால் மீனுக்கு வரவேற்பு அதிகம். விரால் மீன்களின் சுவை தனித்து காணப்படுவதே இதற்கான காரணம் எனலாம். அதனால், விரால் மீன்களுக்கு சந்தையில் நல்ல விலை உள்ளது.

உணவு :

🐟 குளங்களில் வளர்க்கப்படும் விரால் மீன்களுக்கு என்று தனியாக ஊட்டச்சத்து மிகுந்த அடர்தீவனம் விற்பனை செய்யப்படுகின்றன. குளத்தின் மேல் கூண்டு அமைத்து கோழி, முயல், புறா, வான்கோழிகளை வளர்த்தால் அவற்றின் எச்சம் இந்த குளத்தில் விழும். அந்த எச்சம் மீன்களுக்கு உணவாகும்.

🐟 அதுமட்டுமன்றி கொசு ஒழிப்பு மீன்கள், திலேப்பியாக் குஞ்சுகள், சிறுங்கெண்டைகள், தவளையின் தலைப்பிரட்டைகள், மண்புழுக்கள், ரத்தப் புழுக்கள், தேவதை இறால்கள், நெத்திலிக் கருவாடு, துண்டுகளாக வெட்டப்பட்ட கழிவு மீன்கள், கோழிக் குடல்கள் மற்றும் மாட்டிறைச்சி போன்றவற்றை உணவாக தரலாம்.

🐟 விரால் வளர்ப்பில் உணவும், உணவிடலும் மிக மிக முக்கியம். அவற்றின் உணவுத் தேவையை தினமும் நிறைவு செய்ய வேண்டும். காலை 7 மணி, மாலை 5 மணி என்ற அளவில் உணவிடலாம்.

🐟 மீன் வளர்ப்பின் போது மாதம் ஒரு முறை மாதிரி மீன் பிடிப்பு நடத்தி, மீன்கள் பெற்றிருக்கும் சராசரி வளர்ச்சியை அறிய வேண்டும். ஒவ்வொரு மாதமும் குளத்தில் அதிகரிக்கும் மீன்களின் மொத்த எடைக்கு ஏற்ப, உணவின் அளவை அதிகரித்து கொடுக்க வேண்டும்.

🐟 மாட்டு சாணமும் மீன்களுக்கு உணவாக அளிக்கலாம். சரியான பராமரிப்பு இருந்தால் குட்டை வளர்ப்பில் விரால் மீன்கள் 4 மாதத்தில் 1 கிலோ எடை வளரும். இன்றைக்கு, விரால் மீன்கள் சந்தையில் 1 கிலோ 400 முதல் 450 ரூபாய்க்கு விற்கப்படுகிறது. குளத்தில் இடப்படும் மீன் குஞ்சுகளின் எண்ணிக்கைக்கு ஏற்றாற்போல் வருமானமும் கிடைக்கும்.

வேறு வகை மீன்கள் :

🐟 இதே போன்ற குளத்தில் கொடுவா மீன்கள், மயிலை மீன்கள், மீசை விரால் மீன்களையும் வளர்க்கலாம். ஒருங்கிணைந்த பண்ணைகளை அமைக்கும் போது இது போன்ற மீன் வளர்ப்பு தொடர் வருமானத்திற்கு மிகச்சிறந்த தொழிலாக இருக்கும்.